Fforwm ABCUL Cymru sy’n noddi Gwobrau Undebau Credyd

Bydd Gwobrau Undebau Credyd Cymru 2022 yn cael eu noddi unwaith eto gan Fforwm Cymru Cymdeithas Undebau Credyd Prydain Cyf (ABCUL).

Bydd y gwobrau yn dathlu cyfraniad gwirfoddolwyr, aelodau, ysgolion, a chyflogwyr partner i lwyddiant y mudiad undebau credyd yng Nghymru.

Yn dilyn dwy flynedd o seremonïau cyflwyno rhithwir oherwydd cyfyngiadau symud Covid-19, cynhelir y gwobrau eleni yn Adeilad y Pierhead ym Mae Caerdydd ar 20 Hydref 2022, sef Diwrnod Rhyngwladol Undebau Credyd.

ABCUL yw’r brif gymdeithas fasnach ar gyfer undebau credyd ym Mhrydain, a lywodraethir gan gyfarwyddwyr gwirfoddol o bob rhan o’r sylfaen aelodau.

Mae ABCUL yn canolbwyntio ar rôl cynrychiolaeth ac eiriolaeth ar gyfer eu haelodau undebau credyd i swyddogion y llywodraeth, llunwyr polisi, rheoleiddwyr, rhanddeiliaid perthnasol eraill, a’r cyfryngau.

Mae’r Gymdeithas yn cynrychioli’r rhan fwyaf o undebau credyd Prydain ar bob mesur allweddol ac mae’n darparu ystod lawn o wasanaethau cyngor, hyfforddiant a datblygu i’w helpu i dyfu’n gwmnïau cydweithredol ariannol cynaliadwy a ffyniannus.

Dywedodd Robert Kelly, Prif Weithredwr ABCUL:
“Ar draws y byd, mae undebau credyd yn canolbwyntio ar adeiladu cymunedau a helpu pobl i reoli eu harian, fforddio eu bywydau bob dydd, a gwella eu dyfodol.

“Mae Fforwm ABCUL Cymru yn falch iawn o noddi’r gwobrau fel ffordd o ddathlu popeth sy’n wych am undebau credyd yng Nghymru.

“Mae’r gwobrau’n arddangos y gwahanol ffyrdd y mae undebau credyd Cymru yn gwneud gwahaniaeth gwirioneddol yn y cymunedau rydyn ni’n eu gwasanaethu ac maen nhw’n gyfle i ddweud diolch i’n partneriaid a’n gwirfoddolwyr – fydden ni ddim yn gallu gwneud hynny hebddyn nhw.”

Cefnogir gwobrau Undebau Credyd Cymru gan Lywodraeth Cymru.

I gael rhagor o wybodaeth am ABCUL ewch i www.abcul.org