Rhoi gwiriad iechyd ariannol i chi’ch hun

Ionawr yw’r mis perffaith i adolygu eich arian personol.

Yn union fel eich iechyd corfforol a meddyliol, mae eich lles ariannol yn bwysig hefyd a dyna pam y dylech asesu eich incwm a’ch gwariant yn rheolaidd.

Bydd hyn yn helpu i gadw’ch nodau ariannol ar y trywydd iawn ac yn rhoi gwell dealltwriaeth o sut rydych chi’n rheoli’ch arian. Mae hefyd yn amser delfrydol i wneud newidiadau lle bo angen.

Dyma ein 10 awgrym gorau:

1. Beth yw eich nodau ariannol?
   Oes gennych chi ddigwyddiad mawr ar y gweill fel priodas? Efallai bod angen rhywfaint o ‘TLC’ ar eich cartref? Oes angen car newydd arnoch chi? Neu a ydych chi’n gobeithio mynd â’ch teulu dramor ar wyliau o’r diwedd?.
2. Ble ydych chi’n sefyll yn ariannol ar hyn o bryd?
   Mae arolwg o 3,000 o oedolion, a gynhaliwyd ar gyfer Wythnos Siarad am Arian (Tachwedd 7-11), yn dangos nad oes gan un o bob chwech (17%) ddim i’w gadw ac un arall o bob deg (9%) â £100 neu lai. Edrychwch ar eich cyfrifon cynilo a chyfrifwch faint sydd gennych mewn gwirionedd unwaith y bydd yr holl filiau misol wedi’u talu.
3. Traciwch eich arferion gwario
   Ewch drwy eich cyfriflenni banc ac edrychwch ar eich trafodion a threuliau rheolaidd. Gall hyn dynnu sylw at y pethau rydych yn talu amdanynt nad oes eu hangen arnoch. Os oes gennych chi bryderon difrifol am eich incwm yn gostwng neu os ydych chi’n cael trafferth aros ar y trywydd iawn gyda’ch cynilion, yna gosodwch her i chi’ch hun fel “pythefnos gwariant isel”
4. Llunio Cyllideb
   Rhestrwch yr holl ffynonellau incwm sydd gennych a’r holl fathau o bethau rydych yn gwario arnynt, fel y gallwch weld beth sydd – neu sydd ddim – yn weddill.
   Benthyciadau a Dyled
5. Gwnewch dalu unrhyw fenthyciadau yn ôl yn flaenoriaeth. Gallai cerdyn credyd gyda llog o 0% ar bryniant am y 12 mis nesaf fod yn opsiwn ar gyfer ariannu unrhyw golled incwm neu dreuliau ychwanegol, os nad oes gennych unrhyw gynilion arian parod. Cofiwch fod undebau credyd ledled Cymru yn cynnig benthyciadau fforddiadwy rhwng £100 a £15,000.
6. Arbedion diwrnod glawog
   Yn ddelfrydol, dylech anelu at gael digon o arian i dalu gwerth 3 mis o’ch treuliau hanfodol mewn cyfrif cynilo mynediad hawdd. Mewn gwirionedd, anaml y mae hyn yn wir – yn enwedig yn ystod yr argyfwng costau byw presennol – ond mae’n bwysig neilltuo arian ar gyfer argyfyngau fel peiriant golchi wedi torri lawr neu eich car yn methu’r MoT. Mae’n bosibl y gallwch chi wneud hyn trwy seiffno rhywfaint o arian o gronfa gynilo arall, neu ddechrau o’r dechrau gan ddefnyddio arian rydych chi wedi’i docio o’ch gwariant.
7. Cymorth Budd-daliadau
   Sicrhewch eich bod yn hawlio unrhyw fudd-daliadau y gallech fod â hawl iddynt. Efallai bod budd-daliadau eraill ar gael nad ydych yn eu hawlio.
8. Gwiriwch eich adroddiad credyd
   Gall cael sgôr credyd da a hanes credyd eich helpu i gael cyfraddau llog is, sy’n arwain at arbed arian! Mae gwirio eich credyd yn rhan bwysig o wiriad iechyd ariannol.
9. Ydych chi’n dal i fod ar yr holl fargeinion gorau?
   Adolygwch eich premiymau yswiriant, costau cyfleustodau a biliau band eang a ffonau symudol. Yn y gorffennol newid darparwr ynni oedd un o’r ffyrdd gorau o arbed arian ar eich biliau. Fodd bynnag, gyda nifer y cyflenwyr yn cwympo oherwydd costau cyfanwerthu cynyddol, mae’n debygol y byddai’n well i chi aros yn dawel am y tro.
10. Gwiriwch eich pensiynau
    A fydd gennych chi ddigon o arian yn eich cronfa bensiwn i ymddeol pan fyddwch chi eisiau? Chwiliwch am y cyfleoedd i gynyddu eich cyfraniad pensiwn os gallwch ei fforddio, a gwnewch yn siŵr bod eich dyddiad ymddeol targed yn gywir.

Gall mabwysiadu arferion ariannol iach gymryd rhywfaint o ddisgyblaeth, ond mae’n dod yn haws unwaith y byddwch chi’n dod i mewn i drefn.

Ymunwch â’ch undeb credyd agosaf heddiw a chael mynediad at amrywiaeth o opsiynau cynilo a benthyciad fforddiadwy.